ტრუბინის ღამე და ხვიჩას ბოდიში: საქართველო 0:0 უკრაინა
საქართველო და უკრაინა ერთა ლიგაში 0:0-ით დაშორდნენ. ტრუბინმა ხუთი სახიფათო დარტყმა მოიგერია, კვარაცხელიამ კი გულშემატკივრებს ბოდიში მოუხადა.
ხუთჯერ. ზუსტად ამდენჯერ დაგვიკეტა კარი ანატოლი ტრუბინმა ორშაბათ საღამოს დინამო არენაზე. ვყვიროდით, ფეხზე ვდგებოდით, თავში ხელებს ვიშენდით — და სახლში მაინც 0:0-ით წავედით. საქართველო – უკრაინა ერთა ლიგის მეორე ტურში ფრედ დასრულდა, ჩვენი ნაკრები კი უკვე ოთხ ტაიმს ითვლის გოლის გარეშე.
თამაში კი ნამდვილად ჩვენი იყო. მესამე წუთზე ვალერი ბონდარმა ბურთი საკუთარ ნახევარზე დაკარგა და ტრუბინს პირველად მოუწია გადარჩენა. დაახლოებით მეოცე წუთზე გიორგი ჩაკვეტაძემ „ცხრიანისკენ“ ისროლა, მეკარემ კი ბურთი პირდაპირ კუთხიდან ამოიღო. Sofascore-მა ჩაკვეტაძეს 7.4 მისცა — ჩვენებში საუკეთესო შეფასება. ოთარ კიტეიშვილი ორჯერ ცდიდა ბედს საჯარიმოს გარედან, ხვიჩა კვარაცხელია კი, კაპიტნის სამკლაურით, მთელი საღამო ორ-სამ მეტოქეს ერთად ითრევდა.
სვანაძემ სანიოლის დროინდელ კარკასს დიდად არ შეხებია. სასტარტოდ გამოვიდნენ: მამარდაშვილი; ოთარ კაკაბაძე, საბა გოგლიჩიძე, ლაშა დვალი, ლუკა ლოჩოშვილი; გიორგი კოჩორაშვილი, ჩაკვეტაძე, კიტეიშვილი, გიორგი წიტაიშვილი; ჟორჟ მიქაუტაძე და კვარაცხელია. ყველაზე სახიფათო მომენტები მაინც ფლანგებიდან და შორი დარტყმებიდან იბადებოდა.
შესვენების შემდეგ უკრაინა სხვა გუნდად გამოვიდა — ამას თავად ხვიჩაც აღიარებს. სტუმრებმა ბურთი ნაკლებად დაგვითმეს, ჩვენ კი სივრცე შემცირდა. 63-ე წუთზე კვარაცხელიამ ჩაკვეტაძის პასის შემდეგ მახვილი კუთხიდან დაარტყა, ბონდარმა ბლოკი დადო. ერთადერთი რეალური საფრთხე ჩვენს კართან 85-ე წუთზე შეიქმნა: ოჩერეტკოს დაბალ დარტყმაზე გიორგი მამარდაშვილი ადგილზე აღმოჩნდა.
სტუმრებმა უხეშად ითამაშეს: უკრაინელებმა ოთხი ყვითელი ბარათი მიიღეს — ვანატმა, სიკანმა, ბონდარმა და ოჩერეტკომ, ჩვენებმა ორი — გოგლიჩიძემ 54-ე და მექვაბიშვილმა 80-ე წუთზე.
Flashscore-მა მატჩის საუკეთესოდ სწორედ ტრუბინი დაასახელა (7.6). ტრუბინს ახლა თბილისში ხაჭაპურს უფასოდ ალბათ ვეღარავინ აჭმევს.
რამაზ სვანაძემ ნაკრებთან პირველი მატჩი ორი სიტყვით შეაფასა: „უკეთესები ვიყავით“. ვინ შეედავება? მაგრამ ცხრილი შეფასებებს არ ითვლის. კვარაცხელია მატჩის შემდეგ გულშემატკივრებს მიმართა და უკრაინა ევროპის ერთ-ერთ უძლიერეს ნაკრებად მოიხსენია.
ჯგუფის მეორე მატჩში ჩრდილოეთ ირლანდიამ და უნგრეთმა ბელფასტში ასევე ანგარიში ვერ გახსნეს — ირლანდიელებმა ძელსაც მოარტყეს. ორი ტურის შემდეგ სურათი ასეთია:
შემდეგი ორი მატჩი გასვლაზეა: 2 ოქტომბერს უნგრეთთან (თბილისის დროით 22:45), 5 ოქტომბერს კი ჩრდილოეთ ირლანდიასთან.
ოთხი ტაიმი გოლის გარეშე. პარასკევს, ბუდაპეშტში, მეხუთე იწყება.